لاہور میں بچوں کی گائیکی نے نارویجن موسیقار کو جھومنے پر مجبور کردیا، ویڈیو وائرل

لاہور کی ‘سرتال اکیڈمی’ کے بچوں کی روانی اور شاندار گائیکی نے ناروے کے معروف موسیقار اور ہپ ہاپ بینڈ ‘کوئیک اسٹائل’ کے رکن ولیم گیمبورگ کو بھی داد دینے پر مجبور کر دیا۔ سرتال اکیڈمی کے بانی ضیا الحق کے مطابق یہ ویڈیو گزشتہ ہفتے ریکارڈ کی گئی تھی، جسے ولیم گیمبورگ نے اپنے انسٹاگرام پر شیئر کیا۔ پوسٹ ہوتے ہی یہ ویڈیو سوشل میڈیا پر وائرل ہو گئی، جسے صرف 2 روز کے دوران ساڑھے 8 کروڑ سے زائد مرتبہ دیکھا جا چکا ہے اور 90 لاکھ سے زیادہ صارفین نے اسے لائیک کیا ہے۔ سوشل میڈیا صارفین بچوں کے اعتماد اور بہترین سروں کی بے حد تعریف کر رہے ہیں۔ واضح رہے کہ ولیم گیمبورگ اس ‘کوئیک اسٹائل’ بینڈ کے رکن ہیں جو 2022 میں بالی ووڈ گانے ‘کالا چشمہ’ پر اپنے وائرل ڈانس کی بدولت دنیا بھر میں شہرت حاصل کر چکا ہے۔