ارشد وارثی نے شاہ رخ خان کی فلم ’کنگ‘ سائن کرنے کی اصل وجہ بتا دی

بالی ووڈ کے معروف اداکار ارشد وارثی نے اپنی آنے والی کامیڈی فلم ’دھمال 4‘ کی پروموشن کے دوران انکشاف کیا ہے کہ انہوں نے شاہ رخ خان کی فلم ’کنگ‘ صرف اور صرف خان فیملی سے محبت کی بنیاد پر سائن کی ہے۔

ایک حالیہ انٹرویو کے دوران ارشد وارثی کا کہنا تھا کہ وہ شاہ رخ خان اور ان کے خاندان کو کبھی کسی کام کے لیے انکار نہیں کر سکتے۔ انہوں نے ماضی کا ایک واقعہ شیئر کرتے ہوئے بتایا کہ ایک بار شاہ رخ خان کے بیٹے آریان خان نے انہیں نیٹ فلکس کی ایک ویب سیریز کے لیے فون کیا، تو انہوں نے اسکرپٹ یا کہانی سنے بغیر ہی فوراً حامی بھر لی تھی۔

ارشد وارثی کے مطابق آریان خان انہیں کہانی سنانا چاہتے تھے، لیکن انہوں نے منع کر دیا اور کہا کہ “مجھے کچھ نہیں سننا، تمہیں مجھ سے دو دن جو بھی کام کروانا ہے کروا لو۔” اداکار نے مزید بتایا کہ انہوں نے آریان سے کہا کہ وہ یہ سب صرف اس لیے کر رہے ہیں کیونکہ وہ ان کے والد (شاہ رخ خان)، آریان اور ان کی پوری فیملی سے بے پناہ محبت کرتے ہیں۔