عامر خان نے گوری سپراٹ سے تیسری شادی کر لی

بالی ووڈ کے مایہ ناز اور معروف اداکار عامر خان اپنی دیرینہ دوست اور ساتھی گوری سپراٹ کے ساتھ ایک نجی اور سادہ تقریب میں شادی کے بندھن میں بندھ گئے ہیں۔

بھارتی میڈیا کی رپورٹس کے مطابق، شادی کی یہ پروقار مگر سادہ تقریب اتوار کے روز ممبئی میں عامر خان کی رہائش گاہ پر منعقد ہوئی، جہاں دونوں شخصیات نے باقاعدہ ‘اسپیشل میرج ایکٹ’ کے تحت اپنی شادی رجسٹر کروائی۔ اس نجی تقریب کو انتہائی خفیہ اور محدود رکھا گیا تھا جس میں صرف دونوں خاندانوں کے قریبی اہل خانہ اور خاص دوستوں نے ہی شرکت کی۔ شادی کے اس اہم موقع پر عامر خان کے بچے جنید، آئرہ اور آزاد بھی اپنے والد کی خوشیوں میں شریک ہونے کے لیے موجود تھے۔

میڈیا رپورٹس میں بتایا گیا ہے کہ عامر خان اور گوری سپراٹ ایک دوسرے کو تقریباً 25 برس سے جانتے ہیں، تاہم سال 2024ء میں دوبارہ رابطہ بحال ہونے کے بعد ان کا رشتہ مزید مضبوط ہوا۔ بعد ازاں، عامر خان نے مارچ 2025ء میں اپنی 60ویں سالگرہ کے موقع پر پہلی بار گوری سپراٹ کو دنیا کے سامنے اپنی گرل فرینڈ کے طور پر متعارف کروایا تھا۔ واضح رہے کہ یہ عامر خان کی تیسری شادی ہے، اس سے قبل وہ رینا دتا اور مشہور فلم ساز کرن راؤ کے ساتھ رشتۂ ازدواج میں منسلک رہ چکے ہیں۔