مومنہ اقبال ہراسانی کیس: ثاقب چدھڑ اور اہلیہ کو شاملِ تفتیش ہونے کا حکم

سیشن کورٹ لاہور نے معروف اداکارہ مومنہ اقبال کو مبینہ طور پر ہراساں کرنے اور جان سے مارنے کی دھمکیاں دینے کے مقدمے میں ایم پی اے ثاقب چدھڑ اور ان کی اہلیہ کو شاملِ تفتیش ہونے کا حکم دے دیا ہے۔ ایڈیشنل سیشن جج نصرت علی صدیقی نے ملزمان کی عبوری ضمانت کی درخواستوں پر سماعت کی، جہاں دونوں ملزمان ضمانت کی مدت ختم ہونے پر عدالت میں پیش ہوئے۔ دورانِ سماعت عدالت نے ملزمان کو تفتیش کا حصہ بننے کی ہدایت جاری کرتے ہوئے نیشنل سائبر کرائم انویسٹی گیشن ایجنسی سے آئندہ سماعت پر تفصیلی رپورٹ طلب کر لی ہے۔ عدالت نے ثاقب چدھڑ اور ان کی اہلیہ کی عبوری ضمانت میں 13 جولائی تک توسیع کرتے ہوئے کیس کی مزید کارروائی ملتوی کر دی ہے۔