اسپائیڈر مین کے نئے ٹیزر میں لیونل میسی کی جھلک، کیا فٹبالر کوئی اہم کردار ادا کررہے ہیں؟

فٹبال کی دنیا کے مایہ ناز سپر اسٹار لیونل میسی کی ایک نئی سپر ہیرو فلم میں غیر متوقع جھلک نے دنیا بھر میں موجود ان کے کروڑوں مداحوں میں جوش و خروش کی لہر دوڑا دی ہے۔ ہالی ووڈ کی معروف فلم سیریز کی اگلی کڑی ’’اسپائیڈرمین: برانڈ نیو ڈے‘‘ کے تازہ ترین ٹیزر میں میسی کی مختصر موجودگی نے سوشل میڈیا پر ایک نئی بحث چھیڑ دی ہے جہاں شائقین اس حیران کن اشتراک پر دلچسپ تبصرے کر رہے ہیں۔

غیر ملکی میڈیا رپورٹس کے مطابق، فلم کے اس نئے ٹیزر میں لیونل میسی کو اسپائیڈرمین سے ملاقات کرتے ہوئے دکھایا گیا ہے۔ ٹیزر کے ریلیز ہوتے ہی یہ منظر انٹرنیٹ پر جنگل کی آگ کی طرح پھیل گیا اور مداحوں نے اسے فلم کی تشہیری مہم کا سب سے منفرد اور یادگار لمحہ قرار دیا۔ اگرچہ ابھی تک یہ مکمل طور پر واضح نہیں ہو سکا کہ میسی کی جھلک والا یہ ٹیزر صرف مارکیٹنگ کی تشہیر تک محدود ہے یا ارجنٹائن کے اسٹار فٹبالر واقعی فلم میں کوئی باقاعدہ کردار ادا کرنے والے ہیں، لیکن اس وائرل ویڈیو نے شائقین کا تجسس عروج پر پہنچا دیا ہے۔

فلم میں برطانوی اداکار ٹام ہالینڈ ایک مرتبہ پھر پیٹر پارکر (اسپائیڈر مین) کے مرکزی کردار میں نظر آئیں گے۔ اس نئی فلم کی کہانی ’’اسپائیڈرمین: نو وے ہوم‘‘ کے واقعات کے تسلسل سے آگے بڑھے گی، جہاں پیٹر پارکر اپنی پرانی شناخت اور قریبی زندگی سے محروم ہونے کے بعد بالکل نئے سفر کا آغاز کرتا ہے۔ فلم سازوں اور ہدایت کاروں کے مطابق، اس بار ناظرین کو اسپائیڈر مین کا پہلے سے مختلف، پختہ اور چیلنجز سے بھرپور روپ دیکھنے کو ملے گا۔

یہ فلم رواں ماہ 31 جولائی کو دنیا بھر کے سینما گھروں کی زینت بنے گی۔ ٹام ہالینڈ کی واپسی، مارول کائنات (MCU) کے دیگر کرداروں کی متوقع موجودگی اور اب لیونل میسی کی اس غیر متوقع جھلک نے ریلیز سے قبل ہی اس فلم کو دنیا بھر میں سب سے زیادہ زیرِ بحث آنے والی ہالی ووڈ فلموں کی فہرست میں شامل کر دیا ہے۔