پی سی بی اور الائیڈ بینک میں سکولز ٹیلنٹ ہنٹ پروگرام کیلئے 10 کروڑ روپے کا معاہدہ

پاکستان کرکٹ بورڈ (پی سی بی) اور الائیڈ بینک آف پاکستان کے درمیان ’سکولز ٹیلنٹ ہنٹ پروگرام‘ کے انعقاد کے لیے ایک اہم معاہدہ طے پا گیا ہے، جس کے تحت الائیڈ بینک اس پروگرام کے لیے سپانسرشپ کی مد میں مجموعی طور پر 10 کروڑ روپے فراہم کرے گا۔

لاہور کے تاریخی قذافی سٹیڈیم میں مفاہمتی یادداشت (MoU) پر دستخط کرنے کی ایک پروقار تقریب منعقد ہوئی، جس میں چیئرمین پی سی بی محسن نقوی مہمانِ خصوصی کی حیثیت سے شریک ہوئے۔ تقریب میں وفاقی وزیر اطلاعات عطا اللہ تارڑ، رکن قومی اسمبلی عون چوہدری اور ڈائریکٹر کمرشل پی سی بی علی عدنان زیدی بھی موجود تھے۔ اس مفاہمتی یادداشت پر پاکستان کرکٹ بورڈ کی جانب سے چیف آپریٹنگ آفیسر سمیر احمد اور الائیڈ بینک آف پاکستان کی جانب سے چیف کمرشل اینڈ ریٹیل بینکنگ نارتھ عابد انور نے دستخط کیے۔

معاہدے کے تحت پاکستان کرکٹ بورڈ سکولز ٹیلنٹ ہنٹ پروگرام کے تمام انتظامی اور تربیتی امور سنبھالے گا، جبکہ اس پروگرام کے ذریعے ملک بھر کے تعلیمی اداروں یعنی سکولوں میں کرکٹ کا دائرہ کار مزید وسیع کیا جائے گا۔ چیئرمین پی سی بی محسن نقوی نے اس شراکت داری کا خیرمقدم کرتے ہوئے کہا کہ یہ معاہدہ نچلی سطح (گراس روٹ) پر کرکٹ کے فروغ اور نوجوان صلاحیتوں کو نکھارنے میں انتہائی مددگار ثابت ہوگا، اور اس سے پاکستان کرکٹ کے افق پر نئے ستارے جگمگائیں گے۔ دریں اثنا، وفاقی وزیر اطلاعات عطا اللہ تارڑ نے بھی سکولز کرکٹ کو زندہ کرنے کے اس اقدام کو انتہائی خوش آئند قرار دیتے ہوئے چیئرمین پی سی بی کے متحرک کردار کی بھرپور تحسین کی۔