روس کا یوکرین کے 660 ڈرونز تباہ کرنے کا دعویٰ

روس اور یوکرین کے درمیان جاری جنگ میں اچانک شدت آگئی ہے۔ روس نے دعویٰ کیا ہے کہ اس کے فضائی دفاعی نظام نے رات بھر کی کارروائیوں کے دوران یوکرین کے سینکڑوں ڈرونز کو فضا میں ہی تباہ کر دیا ہے، جبکہ دوسری جانب یوکرین نے دارالحکومت کیف پر روسی بیلسٹک میزائل حملے کی تصدیق کی ہے۔

روسی میڈیا ادارے ‘آر ٹی’ نے روسی وزارتِ دفاع کے حوالے سے رپورٹ دی ہے کہ روسی فضائی دفاعی نظام نے رات کے دوران یوکرین کے 660 فکسڈ وِنگ ڈرونز کو کامیابی سے نشانہ بنا کر تباہ کیا۔ کریملن کے مطابق، ان ڈرونز کو روس کے مختلف اسٹریٹجک علاقوں اور سرحدی صوبوں میں مار گرایا گیا۔

دوسری جانب، یوکرین کے اعلیٰ حکام نے بتایا ہے کہ روس نے دارالحکومت کیف کو نشانہ بناتے ہوئے بیلسٹک میزائل حملہ کیا ہے۔ یوکرینی حکام کی جانب سے حملے کے نتیجے میں ہونے والے جانی یا مالی نقصان کی فوری طور پر مزید تفصیلات جاری نہیں کی گئیں۔ دونوں ممالک کے درمیان حملوں میں آنے والی یہ تیزی جنگ کے مزید پھیلنے کے خدشات کو جنم دے رہی ہے۔