جنگ بندی کے باوجود جنوبی لبنان میں اسرائیلی حملے جاری، مزید 7 افراد شہید

جنگ بندی اور سفارتی سطح پر جاری مذاکرات کے باوجود جنوبی لبنان میں اسرائیلی فوج کے فضائی اور زمینی حملوں کا سلسلہ تھم نہ سکا، تازہ ترین حملوں میں مزید 7 افراد کے شہید ہونے کی اطلاعات سامنے آئی ہیں۔ جنوبی لبنان میں اسرائیلی فوج کی جانب سے شدید بمباری کی گئی جس کے نتیجے میں 7 افراد جامِ شہادت نوش کر گئے۔ دوسری جانب اسرائیلی فوج نے دعویٰ کیا ہے کہ حملے میں ہلاک ہونے والے افراد کا تعلق لبنانی مزاحمتی تنظیم حزب اللہ سے تھا۔ اسرائیلی فوج نے جنوبی لبنان کے علاقے ‘المنزلہ’ میں فضائی حملہ کرنے کی باقاعدہ تصدیق کی ہے۔ اسرائیلی حکام کا دعویٰ ہے کہ اس فوجی کارروائی کے دوران ان افراد کو نشانہ بنایا گیا جو وہاں مبینہ طور پر ہتھیار منتقل کرنے میں مصروف تھے۔اسرائیلی فوج نے جس مقام پر بمباری کی اسے ایک جنگی اور نگرانی کی چوکی قرار دیا ہے۔ اس تازہ کارروائی اور ہلاکتوں کے حوالے سے حزب اللہ کی جانب سے اب تک فوری طور پر کوئی ردعمل یا بیان سامنے نہیں آیا ہے۔