ایران نے پڑوسی ممالک میں موجود اسرائیلی فوجی طیاروں کیلئے سخت انتباہ جاری کردیا

ایران کے بااثر عسکری ادارے ‘خاتم الانبیاء مرکزی ہیڈکوارٹر’ نے اسرائیل اور امریکا کو سخت الفاظ میں خبردار کیا ہے کہ اگر اسرائیلی فوجی طیاروں نے ایران پر حملے یا کسی بھی کارروائی کے لیے پڑوسی ممالک کی فضائی حدود استعمال کی، تو اسے ایران کی قومی سلامتی کے لیے براہِ راست خطرہ تصور کیا جائے گا۔ ایرانی سرکاری میڈیا کے مطابق جمعے کے روز جاری کیے گئے ایک اہم بیان میں عسکری قیادت نے واضح کیا کہ پڑوسی ممالک کی فضائی حدود کو استعمال کرتے ہوئے کسی بھی قسم کی اسرائیلی فوجی سرگرمی ایک انتہائی خطرناک اقدام ہے، جس کی اجازت نہیں دی جا سکتی۔ اگر امریکا اسرائیلی جارحانہ کارروائیوں کو روکنے یا ان پر مؤثر کنٹرول قائم کرنے میں ناکام رہتا ہے، تو ایران اپنی سلامتی پر آنچ نہیں آنے دے گا۔ ایران اپنی قومی سلامتی کے خلاف اٹھنے والے کسی بھی قدم یا خطرے کو ہرگز برداشت نہیں کرے گا۔ خاتم الانبیاء سینٹرل ہیڈکوارٹر نے زور دیا کہ ایسے کسی بھی خطرناک اقدام کا بھرپور اور مناسب جواب دینا ایران اپنا جائز اور قانونی حق سمجھتا ہے۔

مشرقِ وسطیٰ میں جاری شدید کشیدگی کے دوران ایران کا یہ سخت بیان پڑوسی ممالک کے لیے بھی ایک واضح پیغام ہے کہ وہ اپنی فضائی حدود اسرائیل کو استعمال کرنے کی اجازت دینے سے باز رہیں۔