ایران جنگ میں پاکستان کا کردار قیامت تک یاد رکھا جائے گا: خواجہ آصف

وفاقی وزیر دفاع خواجہ آصف نے کہا ہے کہ ایران جنگ کے دوران خطے میں امن اور مصالحت کے لیے پاکستان نے جو تاریخی کردار ادا کیا ہے، اسے قیامت تک یاد رکھا جائے گا۔ سیالکوٹ میں میڈیا کے نمائندوں سے گفتگو کرتے ہوئے خواجہ آصف نے کہا کہ اس سال یومِ عاشور ایک ایسے حساس موقع پر آیا ہے جب خطے میں ایک بڑی جنگ جاری تھی۔ انہوں نے ایران کی تعریف کرتے ہوئے کہا کہ ایرانیوں نے اس کڑے وقت میں سنتِ حسینؓ اور کربلا کے شہدا کی عظیم یاد کو ایک بار پھر تازہ کر دیا ہے۔

وزیر دفاع کا کہنا تھا کہ اس جنگ کے دوران پاکستان کا سفارتی کردار انتہائی تعمیری رہا۔ پاکستان نے دونوں ممالک کے درمیان صلح کروانے میں کلیدی کردار ادا کیا، جس کی بدولت ملک نہ صرف عالمی سطح پر بلکہ پوری مسلم امت کے سامنے سرخرو ہوا ہے۔ انہوں نے مزید کہا کہ یہ کامیابی تاریخ کا ایک انمٹ حصہ بن چکی ہے۔ عالمی صورتحال پر بات کرتے ہوئے خواجہ آصف نے امید ظاہر کی کہ لبنان بہت جلد اسرائیلی ظلم و ستم سے نجات پائے گا۔ انہوں نے دعا کی کہ دنیا بھر میں جہاں کہیں بھی مسلمانوں پر ظلم ہو رہا ہے، اللہ تعالیٰ انہیں جلد از جلد آزادی اور امن نصیب فرمائے۔