حزب اللہ کا لبنان سے اسرائیل کے مکمل انخلا تک ہتھیار نہ ڈالنے کا اعلان

لبنان کی مزاحمتی تنظیم حزب اللہ کے سربراہ نعیم قاسم نے دوٹوک انداز میں اعلان کیا ہے کہ لبنان کی سرزمین سے اسرائیل کے مکمل انخلا تک ہتھیار ڈالنے کا سوال ہی پیدا نہیں ہوتا اور تنظیم اپنی مزاحمت جاری رکھے گی۔

اپنے ایک خصوصی بیان میں سربراہ حزب اللہ نعیم قاسم نے کہا کہ حزب اللہ کا صبر اور تحمل ہرگز کمزوری نہیں بلکہ ایک سوچی سمجھی تزویراتی حکمتِ عملی کا حصہ ہے، کیونکہ میدانِ جنگ میں ثابت قدمی ہی کامیابی کا واحد راستہ ہے۔ انہوں نے واضح کیا کہ دریائے لیطانی کے شمال میں حزب اللہ کو غیر مسلح کرنے کے مطالبات قطعی طور پر ناقابلِ قبول ہیں اور جب تک اسرائیل لبنانی علاقوں پر قابض ہے، ہتھیار ڈالنے کے معاملے پر کوئی بات چیت نہیں کی جائے گی۔ ان کا کہنا تھا کہ اسرائیلی جارحیت کا بنیادی مقصد حزب اللہ کا خاتمہ تھا لیکن تل ابیب اپنے اس ہدف میں بری طرح ناکام رہا ہے۔ نعیم قاسم نے لبنانی حکومت کو مخاطب کرتے ہوئے کہا کہ ملکی حکام آدھی آبادی (حزب اللہ کے حامیوں) کو خود سے دور کرنے کے متحمل نہیں ہو سکتے۔ اگر لبنانی حکومت ملکی خودمختاری کے راستے پر چلی تو حزب اللہ ریاست کے ساتھ کھڑی ہوگی۔ انہوں نے لبنانی حکام پر زور دیا کہ وہ امریکا اور اسرائیل کے مفادات کے لیے کام کرنا بند کریں۔ایران اور امریکا کے درمیان ہونے والے حالیہ عبوری معاہدے پر تبصرہ کرتے ہوئے سربراہ حزب اللہ نے کہا کہ یہ معاہدہ دراصل واشنگٹن اور اسرائیل کی شکست کا باقاعدہ اعلان ہے۔ انہوں نے مزید کہا کہ ایران اپنی اندرونی مضبوطی، معاشی و عسکری استقامت اور اصولی موقف کے باعث ہی امریکا کے ساتھ اس مفاہمت کی یادداشت تک پہنچنے میں کامیاب ہوا ہے