قومی اسمبلی؛ شیر افضل مروت کا نکتہ اعتراض، ‘حکومت آئینی ترامیم کے لیے وزراء کی فوج لاتی ہے مگر عوامی مسائل پر کوئی موجود نہیں’

قومی اسمبلی کے حالیہ اجلاس میں اپوزیشن رکن شیر افضل مروت نے نکتہ اعتراض پر سخت موقف اختیار کرتے ہوئے حکومت کو شدید تنقید کا نشانہ بنایا۔ انہوں نے ایوان میں وزراء کی عدم موجودگی پر سوال اٹھاتے ہوئے کہا کہ جب بھی کوئی آئینی ترمیم یا مخصوص قانون منظور کرانا ہوتا ہے تو ایوان میں وزراء کی ‘فوجِ ظفر موج’ نظر آتی ہے، لیکن جب عوامی مفاد کی بات ہو تو وزیر داخلہ سمیت کوئی بھی ذمہ دار ایوان میں موجود نہیں ہوتا۔

شیر افضل مروت نے آئینی ترامیم کے طریقہ کار پر اعتراض کرتے ہوئے دعویٰ کیا کہ ایوان میں پہلے سے تیار شدہ ‘ڈرافٹس’ لائے جاتے ہیں، جن کی تفصیلات سے نہ صرف اپوزیشن بلکہ خود حکومتی ارکان بھی لاعلم ہوتے ہیں۔ وزیر داخلہ محسن نقوی پر تنقید کرتے ہوئے انہوں نے کہا کہ وزیر داخلہ حقائق کو توڑ مروڑ کر پیش کر رہے ہیں۔

اپنے حالیہ دورۂ متحدہ عرب امارات کا ذکر کرتے ہوئے شیر افضل مروت نے انکشاف کیا کہ وہاں سے 18 ہزار سے زائد اہل تشیع مسلک کے پاکستانیوں کو ڈی پورٹ کر کے وطن واپس بھیجا گیا ہے۔ انہوں نے امارات میں گرفتار پاکستانیوں کے حوالے سے لرزہ خیز دعویٰ کیا کہ پاکستانی قیدیوں کو برہنہ کر کے ان کی ویڈیوز بنائی جا رہی ہیں۔ انہوں نے حکومت سے مطالبہ کیا کہ سمندر پار پاکستانیوں کے ساتھ ہونے والے اس سلوک پر خاموشی توڑتے ہوئے عالمی سطح پر دوٹوک موقف اختیار کیا جائے۔