پاک افواج نے دشمن کو عبرتناک سبق سکھایا، وزیراعظم شہباز شریف

وزیراعظم شہباز شریف نے ’معرکہ حق‘ کی مناسبت سے منعقدہ تقریبات سے خطاب کرتے ہوئے کہا ہے کہ پاک افواج نے دشمن کو وہ سبق سکھایا ہے جسے تاریخ ہمیشہ یاد رکھے گی۔ انہوں نے دفاعِ وطن کے لیے افواج اور عوام کے اتحاد کو سراہتے ہوئے کہا کہ پوری قوم اپنی بہادر افواج کے شانہ بشانہ کھڑی ہے اور دشمن کا ہر وار ناکام بنانے کے لیے یک جان و دو قالب ہے۔

یومِ تکبیر کی مناسبت سے گفتگو کرتے ہوئے وزیراعظم نے کہا کہ 28 مئی وہ یادگار دن ہے جب پاکستان ایٹمی قوت بن کر ابھرا۔ انہوں نے اس عظیم مقصد کے حصول کے لیے کام کرنے والے تمام قومی ہیروز اور سائنسدانوں کو دل کی گہرائیوں سے خراجِ تحسین پیش کیا۔ وزیراعظم نے سابق وزیراعظم نواز شریف کے کردار کا خصوصی ذکر کرتے ہوئے کہا کہ انہوں نے دباؤ کے باوجود ایٹمی پروگرام کو پایہ تکمیل تک پہنچانے میں کلیدی کردار ادا کیا۔

علاقائی صورتحال پر بات کرتے ہوئے وزیراعظم نے کہا کہ گزشتہ ڈیڑھ ماہ کے دوران خطے میں جنگ کے بادل منڈلاتے رہے، جس کے اثرات پاکستان کی معیشت پر بھی پڑے ہیں۔ ان کا کہنا تھا کہ عارضی جنگ بندی کے باوجود عالمی سطح پر معاشی چیلنجز موجود ہیں، تاہم حکومت ملک کو استحکام کی طرف لے جانے کے لیے پرعزم ہے۔