چینی صدر کے ساتھ گفتگو بہت اچھی رہی: ٹرمپ

امریکی صدر ڈونلڈ ٹرمپ نے بیجنگ میں اپنے قیام کے دوران چین کے تاریخی اور سیاحتی مرکز ‘ٹیمپل آف ہیون’ (Temple of Heaven) کا دورہ کیا، جہاں ان کی چینی صدر شی جن پنگ کے ساتھ غیر رسمی اور دوستانہ ماحول میں بات چیت ہوئی۔ اس موقع پر امریکی میڈیا سے گفتگو کرتے ہوئے صدر ٹرمپ نے بتایا کہ چینی صدر کے ساتھ ان کی گفتگو بہت اچھی رہی اور یہ ملاقات تقریباً دو گھنٹے تک جاری رہی۔

ٹیمپل آف ہیون، جو منگ اور چنگ سلطنتوں کے دور میں شہنشاہوں کی عبادت اور اچھی فصل کی دعاؤں کا مرکز رہا ہے، کی خوبصورتی سے صدر ٹرمپ کافی متاثر نظر آئے۔ انہوں نے چینی صدر سے مکالمہ کرتے ہوئے کہا کہ “یہ ناقابلِ یقین حد تک زبردست جگہ ہے، چین بہت خوبصورت ہے”۔ دونوں رہنماؤں نے کمپلیکس کے مرکزی ہال کے سامنے تصاویر بھی بنوائیں۔

میڈیا نمائندوں کی جانب سے تائیوان کے حساس معاملے پر سوالات کیے گئے کہ کیا مذاکرات میں اس پر بات ہوئی، تاہم دونوں رہنماؤں نے کوئی جواب نہیں دیا اور مندر کی جانب بڑھ گئے۔ جب ایک رپورٹر نے مذاکرات کے نتائج کے بارے میں پوچھا تو صدر ٹرمپ نے مختصر جواب دیتے ہوئے کہا کہ “انتظار کریں”۔ اس دورے کو دونوں ممالک کے درمیان تعلقات میں بہتری اور باہمی احترام کے اظہار کے طور پر دیکھا جا رہا ہے۔