پاکستان نے اقلیتوں کے حقوق کا خیال رکھا، ہمیں مکمل آزادی ہے: بینیتا ڈیوڈ

معروف پاکستانی اداکارہ اور ماڈل بینیتا ڈیوڈ نے حال ہی میں ایک پوڈ کاسٹ میں شرکت کی، جہاں انہوں نے پاکستان میں بطور مسیحی رہنے کے اپنے تجربات اور مذہبی ہم آہنگی پر کھل کر گفتگو کی۔

انٹرویو کے دوران بینیتا ڈیوڈ نے بتایا کہ پاکستان میں مسیحی برادری ناصرف اپنے مذہبی تہوار جیسے کرسمس اور ایسٹر روایتی جوش و خروش سے مناتی ہے، بلکہ عیدالفطر اور عیدالاضحیٰ کی خوشیوں میں بھی برابر کی شریک ہوتی ہے۔ انہوں نے مسکراتے ہوئے کہا کہ “ہم مسیحی سال میں چار عیدیں مناتے ہیں” اور تمام ثقافتی تقریبات میں بھرپور حصہ لیتے ہیں۔ اداکارہ نے اس بات پر زور دیا کہ پاکستان میں انہیں اپنے عقائد کے تحفظ، عزت اور روزگار کے بہترین مواقع ملے ہیں اور وہ یہاں مکمل آزادی محسوس کرتی ہیں۔

گفتگو کے دوران انہوں نے ٹی وی پروگرامز میں اقلیتی فنکاروں سے کیے جانے والے مخصوص سوالات پر بھی بات کی۔ بینیتا کا کہنا تھا کہ ان کے شوہر اس بات کو سخت ناپسند کرتے ہیں کہ شوز میں مذہب سے متعلق غیر ضروری یا عجیب سوالات اٹھائے جائیں۔ پوڈ کاسٹ کے میزبان نے بھی اس نکتے کی تائید کرتے ہوئے کہا کہ سنیتا مارشل جیسے دیگر مسیحی فنکاروں سے بار بار ان کے عقائد کے بارے میں پوچھنا ایک غیر مناسب رجحان ہے جس کی حوصلہ شکنی ہونی چاہیے۔