پاکستان کی ٹیکسٹائل صنعت پائیداری میں اہم پیش رفت کر رہی ہے: برطانوی ہائی کمشنر

برطانوی ہائی کمشنر جین میریٹ نے آل پاکستان ٹیکسٹائل ملز ایسوسی ایشن (اپٹما) کا دورہ کیا، جہاں انہوں نے کہا کہ پاکستان کی ٹیکسٹائل صنعت پائیداری اور عالمی معیارات کے حوالے سے نمایاں پیش رفت کر رہی ہے۔ جین میریٹ نے پاکستانی برآمد کنندگان پر زور دیا کہ وہ برطانوی مارکیٹ میں دستیاب تجارتی مواقع سے بھرپور فائدہ اٹھائیں اور برطانیہ کی تجارتی نمائشوں میں شرکت یقینی بنائیں۔ انہوں نے ٹیکنیکل ٹیکسٹائل، تحقیق اور جدت کے شعبوں میں مشترکہ منصوبوں کے امکانات کو اجاگر کیا۔ اس موقع پر چیئرمین اپٹما اسد شفیع نے برطانوی جامعات اور تحقیقی اداروں کے ساتھ تعاون پر زور دیتے ہوئے اپٹما اور برطانوی اداروں کے درمیان عملی تعاون کا فریم ورک تشکیل دینے کی تجویز دی۔