نیدرلینڈز: 1300 برس قدیم وائکنگز کی کشتی کا ٹکڑا دریافت

ایمسٹرڈیم: نیدرلینڈز میں نکاسی کے معمول کے کام کے دوران مزدوروں نے اتفاقاً ایک ایسی دریافت کی ہے جس نے ماہرینِ آثارِ قدیمہ کو حیران کر دیا ہے۔ کھدائی کے دوران زمین سے تقریباً 1300 برس قدیم وائکنگز (Vikings) کی کشتی کا ایک بڑا لکڑی کا ٹکڑا برآمد ہوا ہے۔ یہ دریافت اس وقت منظرِ عام پر آئی جب مزدوروں کی نظر مٹی سے باہر نکلے ہوئے ایک قدیم لکڑی کے پھٹے پر پڑی۔

اس غیر معمولی دریافت نے فوری طور پر امیچور ماہرِ آثارِ قدیمہ ڈینی وین باسٹن کی توجہ حاصل کی، جس کے بعد ‘اسٹچنگ بیہیر وائکنگ شپ اینڈ میوزیم ڈوریسٹڈ’ کے ماہرین کو تفصیلی معائنے کے لیے طلب کیا گیا۔ جہاز سازی کے ماہر کِیس اسٹیرنبرگ نے لکڑی کے ٹکڑے کا جائزہ لینے کے بعد بتایا کہ اس کی مخصوص شکل، تراشے ہوئے کنارے اور ماہرانہ ہنرکاری واضح کرتی ہے کہ یہ کسی قدیم کشتی کے فریم کا ‘بِیم’ (Beam) ہے۔

ماہرین کے مطابق یہ بِیم تقریباً 3.2 میٹر لمبا اور 30 سینٹی میٹر چوڑا ہے، تاہم قیاس کیا جا رہا ہے کہ زمین کے اندر اس کا مزید حصہ بھی موجود ہو سکتا ہے۔ اس دریافت سے خطے میں وائکنگز کی قدیم نقل و حرکت اور جہاز سازی کی مہارتوں کو سمجھنے میں نئی مدد ملے گی۔