کینیڈا سے اسکاٹ لینڈ تک کا سمندری سفر: ساحلِ سمندر پر کتے کو بوتل میں بند 2 سال پرانا پیغام مل گیا

ایبرڈین: اسکاٹ لینڈ کے شہر ایبرڈین میں ایک شہری کو سیر کے دوران سمندر کنارے ایک ایسی بوتل ملی ہے جس نے کینیڈا کے جزیرے ‘پرنس ایڈورڈ’ سے اسکاٹ لینڈ تک کا طویل سفر طے کیا۔ مائیک اسکاٹ نامی شہری اپنے کتوں کے ہمراہ ‘سینٹ سائرس’ کے ساحل پر چہل قدمی کر رہے تھے جب ان کے ایک کتے کی نظر اتھلے پانی میں تیرتی ایک بوتل پر پڑی۔

مائیک نے جب بوتل اٹھائی تو دیکھا کہ اس کے اندر ایک خط موجود ہے، جسے پانی سے محفوظ رکھنے کے لیے پلاسٹک کی تھیلی میں مہارت سے سیل کیا گیا تھا۔ فرانسیسی زبان میں لکھا گیا یہ خط اگست 2024 کا ہے، جسے اینی چائیسن نامی خاتون نے تحریر کیا تھا۔ خط کے متن کے مطابق، اس بوتل کو پرنس ایڈورڈ آئی لینڈ سے کیوبک میں ‘آئلس ڈی لا میڈیلن’ کے لیے سمندر برد کیا گیا تھا۔

خط لکھنے والی خاتون اینی چائیسن نے پیغام کے آخر میں یہ درخواست بھی کی تھی کہ جس کسی کو بھی یہ بوتل ملے، وہ فیس بک کے ذریعے ان سے رابطہ کرے۔ مائیک اسکاٹ کے مطابق یہ ایک حیرت انگیز تجربہ ہے کہ کس طرح ایک چھوٹا سا پیغام ہزاروں میل کا فاصلہ طے کر کے ایک ملک سے دوسرے ملک پہنچ گیا۔ اس واقعے نے سوشل میڈیا پر بھی کافی توجہ حاصل کر لی ہے اور لوگ اسے ‘سمندری معجزہ’ قرار دے رہے ہیں۔