کچرے کو ایندھن میں تبدیل کرنے کے منصوبے کی منظوری دیدی گئی

پشاور: وزیراعلیٰ خیبر پختونخوا سہیل آفریدی نے پبلک پرائیویٹ پارٹنرشپ کے تحت صوبائی دارالحکومت میں کچرے کو ایندھن (Fuel) میں تبدیل کرنے کے منصوبے کی اصولی منظوری دے دی ہے۔ پبلک پرائیویٹ پارٹنرشپ کمیٹی کے دسویں اجلاس کی صدارت کرتے ہوئے وزیراعلیٰ نے نجی کمپنی کی تجویز کو شفافیت اور مسابقت کے لیے مارکیٹ میں پیش کرنے کی ہدایت جاری کر دی ہے۔

اجلاس میں صوبائی وزیر خزانہ مزمل اسلم اور چیف سیکرٹری شہاب علی شاہ سمیت دیگر حکام نے ویڈیو لنک کے ذریعے شرکت کی۔ بریفنگ کے دوران بتایا گیا کہ اس منصوبے کے تحت پشاور کی شمشتو لینڈ فل سائٹ پر ‘میٹریل ریکوری’ اور پروسیسنگ فیسلٹیز قائم کی جائیں گی، جس سے نہ صرف گرین ہاؤس گیسوں کے اخراج میں کمی آئے گی بلکہ ماحول دوست ویسٹ مینجمنٹ بھی ممکن ہو سکے گی۔

وزیراعلیٰ سہیل آفریدی کا کہنا تھا کہ یہ منصوبہ پشاور میں جدید اور پائیدار ویسٹ مینجمنٹ نظام کی بنیاد بنے گا، جو ماحول کے ساتھ ساتھ معیشت کے لیے بھی سود مند ثابت ہوگا۔ انہوں نے مزید واضح کیا کہ پشاور میں کامیابی کے بعد اس ماڈل کو صوبے کے تمام ڈویژنل ہیڈ کوارٹرز تک وسعت دی جائے گی تاکہ پورے صوبے میں صفائی کے نظام کو جدید خطوط پر استوار کیا جا سکے۔