جواد احمد انٹرویو کے دوران آپے سے باہر، میزبان پر برس پڑے، اداکاروں کا سخت ردعمل

معروف گلوکار اور سیاست دان جواد احمد ایک بار پھر اپنے متنازع رویے کے باعث خبروں میں آ گئے ہیں۔

حال ہی میں جواد احمد نے ایک نجی ٹی وی پروگرام میں شرکت کی، جہاں سابق وزیراعظم عمران خان کا ذکر آیا۔ پروگرام کے میزبان عمیر بشیر نے عمران خان کی سوشل میڈیا مقبولیت اور فالوورز کا حوالہ دیا تو جواد احمد اچانک برہم ہو گئے۔

ویڈیوز میں دیکھا جا سکتا ہے کہ گفتگو کے دوران جواد احمد کا لہجہ سخت ہو گیا اور وہ اینکر پر بلند آواز میں تنقید کرنے لگے۔ صورتحال کشیدہ ہونے پر انہوں نے پروگرام ادھورا چھوڑ دیا اور اسٹوڈیو سے باہر چلے گئے۔ جاتے ہوئے انہوں نے عملے سے کہا کہ میزبان کو کمرے سے باہر نکال دیا جائے اور صحافی کو “غیر پیشہ ور” اور “بے وقعت” قرار دیا۔

انٹرویو کے کلپس منظر عام پر آنے کے بعد سوشل میڈیا پر اس واقعے پر شدید ردعمل دیکھنے میں آیا۔ اداکار عمران عباس نے انسٹاگرام پر میزبان کے صبر کو سراہا، جبکہ اداکارہ مشی خان نے طنزیہ انداز میں کہا کہ اینکر کو اس صورتحال کو برداشت کرنے پر آسکر ملنا چاہیے تھا۔

سوشل میڈیا صارفین کی بڑی تعداد نے بھی جواد احمد کے رویے پر تنقید کی، کچھ نے اسے غیر مناسب قرار دیا، جبکہ دیگر نے کہا کہ عوامی شخصیت کو گفتگو کے دوران تحمل اور برداشت کا مظاہرہ کرنا چاہیے۔