صوابی میں پانچ جڑواں نومولود 5 روز بعد انتقال کر گئے

صوابی کے باچا خان میڈیکل کمپلیکس شاہ منصور میں دلخراش واقعہ پیش آیا جہاں بیک وقت پیدا ہونے والے پانچ نومولود بچے پانچ روز بعد انتقال کر گئے۔

ہسپتال ذرائع کے مطابق یہ تمام بچے قبل از وقت پیدا ہوئے تھے، جن میں ایک بیٹا اور چار بیٹیاں شامل تھیں۔ بچوں کو پیدائش کے فوراً بعد انتہائی نگہداشت وارڈ منتقل کیا گیا، تاہم شدید طبی پیچیدگیوں اور کمزوری کے باعث وہ جانبر نہ ہو سکے۔

بچوں کے والد محمد نوید ولد نصیر محمد کا تعلق زیدہ صوابی کے محلہ منصور خیل سے بتایا گیا ہے۔ واقعے کے بعد علاقے میں گہرے رنج و غم کی فضا قائم ہو گئی اور اہلِ علاقہ نے متاثرہ خاندان سے اظہارِ تعزیت کیا۔

ہسپتال انتظامیہ کے مطابق طبی عملے نے بچوں کو بچانے کی ہر ممکن کوشش کی، تاہم قبل از وقت پیدائش ان کی جان نہ بچا سکی۔