فرانس: شمونڈا وائرس سے انسان کے متاثر ہونے کا پہلا کیس ، مریض ہلاک

فرانس کے محکمہ صحت نے انسان میں شمونڈا وائرس (Shamonda Virus) کی منتقلی کے پہلے کیس کی باضابطہ تصدیق کر دی ہے۔ یہ وائرس مچھروں سے مشابہت رکھنے والے چھوٹے کیڑوں (کولی کوائیڈز) کے ذریعے پھیلتا ہے اور جاری موسمِ گرما کے دوران فرانس سمیت یورپ بھر میں مویشیوں کو تیزی سے متاثر کر رہا ہے۔

فرانسیسی قومی ادارہ صحت عامہ (Santé Publique France) کے مطابق، حکام کو 7 اکتوبر کو لیون کے ایک اسپتال میں زیرِ علاج مریض کے وائرس سے متاثر ہونے کی اطلاع ملی تھی۔ مذکورہ مریض پہلے ہی شدید اعصابی بیماری کا شکار اور کمزور مدافعتی نظام کا حامل تھا، جو بعد ازاں انتقال کر گیا۔ متعدد حیاتیاتی نمونوں کے لیبارٹری ٹیسٹس کے بعد ان میں شمونڈا وائرس کی موجودگی کی تصدیق ہوئی۔

عالمی ادارہ صحت (WHO) کے سربراہ ٹیڈروس ایڈہانوم گیبریسس نے بتایا کہ ڈبلیو ایچ او فرانسیسی حکام کے ساتھ مل کر وائرس کے پھیلاؤ کے طریقہ کار اور صحتِ عامہ پر اس کے ممکنہ اثرات کا جائزہ لے رہا ہے۔ فرانسیسی حکام کے مطابق فی الحال انسان سے انسان میں وائرس کی منتقلی یا عام آبادی کو کسی خطرے کے شواہد نہیں ملے۔ واضح رہے کہ شمونڈا وائرس آرتھوبونیا وائرس گروپ سے تعلق رکھتا ہے جس کی پہلی شناخت 1960ء کی دہائی میں نائجیریا میں ہوئی تھی، اور اس سے قبل اسے انسانوں میں غیر منتقل ہونے والا وائرس سمجھا جاتا تھا۔