عطائی کے مبینہ غلط انجکشن لگانے سے 4 سالہ بچی جاں بحق، ملزم گرفتار

پنجاب کے شہر خانیوال میں مبینہ طور پر غلط انجکشن لگنے سے 4 سالہ بچی جان کی بازی ہار گئی، جبکہ واقعہ کے بعد فرار ہونے والے عطائی (کوئیک) کو پولیس نے گرفتار کر کے کلینک سیل کر دیا ہے۔

ذرائع کے مطابق خانیوال میں بیمار بچی کو علاج کے لیے مقامی کلینک لایا گیا تھا جہاں ایک عطائی نے مبینہ طور پر اسے غلط انجکشن لگا دیا، جس سے بچی کی طبیعت شدید بگڑ گئی اور وہ فوری طور پر جانبر نہ ہو سکی۔ بچی کی حالت غیر ہوتے دیکھ کر عطائی موقع سے فرار ہو گیا تھا، تاہم پولیس نے کارروائی کرتے ہوئے ملزم کو گرفتار کر کے تفتیش شروع کر دی ہے۔

ڈپٹی کمشنر خانیوال حنا ارشد نے واقعے کا نوٹس لیتے ہوئے واضح کیا ہے کہ شہریوں کی قیمتی جانوں سے کھیلنے والے غیر مستند اور جعلی معالجین کے خلاف سخت سے سخت قانونی کارروائی کی جائے گی۔ اس المناک واقعے کے بعد ضلعی انتظامیہ نے عطائیوں کے خلاف کریک ڈاؤن مزید تیز کرنے کے احکامات جاری کر دیے ہیں۔