لوئر دیر کے علاقوں میں خسرہ کی وبا پھوٹ پڑی، 5 بچے جاں بحق

خیبر پختونخوا کے ضلع لوئر دیر کے دو دور افتادہ علاقوں میں خسرہ (Measles) کی موذی وبا پھیل گئی ہے، جس کے نتیجے میں 5 بچے جاں بحق ہو گئے ہیں جبکہ متعدد شدید متاثر ہیں۔

تفصیلات کے مطابق وبا کا پھیلاؤ لوئر دیر کے علاقے غوڑاہ بانڈہ اور خوڑ بانڈہ میں ہوا ہے۔ متاثرہ بچوں میں بیماری کی شدید علامات ظاہر ہونے کے بعد انہیں فوری طور پر علاج کے لیے مختلف مقامی و ضلعی ہسپتالوں میں داخل کرایا گیا ہے۔

صورتحال کی سنگینی کو مدنظر رکھتے ہوئے ضلعی انتظامیہ اور محکمہ صحت کی ٹیموں کو ہائی الرٹ کر دیا گیا ہے۔ ڈپٹی کمشنر دیر لوئر بشارت احمد اور ڈسٹرکٹ ہیلتھ آفیسر (DHO) نے متاثرہ علاقوں کا ہنگامی دورہ کیا، جہاں انہوں نے متاثرہ خاندانوں سے تعزیت کی اور طبی انتظامات کا جائزہ لیا۔

محکمہ صحت کے حکام کے مطابق متاثرہ علاقوں میں ہنگامی بنیادوں پر بچوں کی ویکسینیشن کا عمل شروع کر دیا گیا ہے اور طبی ٹیمیں دواؤں اور امداد کی فراہمی میں مصروف ہیں۔ انتظامیہ نے مقامی آبادی سے اپیل کی ہے کہ وہ خسرہ کے خلاف اپنے بچوں کو حفاظتی ٹیکے لازمی لگوائیں تاکہ اس وبا کے مزید پھیلاؤ کو روکا جا سکے۔