پاکستان میں ملٹی نیشنل کمپنیوں کی فلو ویکسینز دستیاب نہ ہو سکیں

ملٹی نیشنل فارما کمپنیوں کی فلو ویکسینز کی قیمتوں کا تنازع طویل ہونے کے باعث پاکستان میں ان کی درآمد اور دستیابی تاحال ممکن نہیں ہو سکی ہے۔ ڈریپ حکام کے مطابق کابینہ نے تاحال فلو ویکسین کی تجویز کردہ قیمت کی منظوری نہیں دی اور معاملہ کمیٹی کو بھیج دیا ہے، جس کے باعث ایبٹ اور ہوئسٹ جیسی بڑی کمپنیاں ویکسین درآمد کرنے سے قاصر ہیں۔ وزارتِ صحت کے مطابق مارکیٹ میں اس وقت صرف چینی ساختہ انفلوئنزا ویکسین کے دو برانڈز (این فلو اور ویریونزا) دستیاب ہیں، جبکہ عالمی ادارہ صحت نے رواں سیزن کے لیے تین اسٹرینز والی فلو ویکسین منظور کی ہے۔ فارما بیورو کے ترجمان نے تصدیق کی ہے کہ قیمتوں کی منظوری نہ ملنے کی وجہ سے دیگر بین الاقوامی برانڈز مارکیٹ میں دستیاب نہیں ہیں۔