حکومت کی پالیسیوں نے صنعتوں اور معیشت کو تباہ کر دیا،ایس ایم تنویر

اسلام آباد: پیٹرن انچیف یونائیٹڈ بزنس گروپ ایس ایم تنویر نے کہا ہے کہ حکومت کی معاشی پالیسیاں معیشت کو تباہ کر رہی ہیں، جس کے نتیجے میں ٹیکسٹائل کے 145 سے زائد یونٹس بند ہو گئے ہیں اور رئیل اسٹیٹ سمیت 40 سے زائد صنعتیں بھی خطرے میں ہیں۔

اسلام آباد میں پریس کانفرنس کرتے ہوئے ایس ایم تنویر نے کہا کہ ایس ایم ایز کا شعبہ “جنک یارڈ” میں چلا گیا ہے اور جو صنعتیں بند ہو چکی ہیں وہ دوبارہ نہیں چل سکتی۔ انہوں نے بجلی کے موجودہ پیکج کو مسترد کرتے ہوئے مطالبہ کیا کہ فی یونٹ بجلی 9 سینٹ پر کی جائے کیونکہ بین الاقوامی مقابلہ میں دیگر ممالک میں قیمت 7 سینٹ ہے۔

انہوں نے مزید کہا کہ کارخانوں میں غریب مزدور سب سے زیادہ متاثر ہو رہا ہے، گیس کی قیمت فوری طور پر 2,000 روپے فی ایم ایم بی ٹی یو لائی جائے، ٹرن اوور ٹیکس صفر کیا جائے، اور انکم ٹیکس کو 39 فیصد سے کم کر کے 20 فیصد کیا جائے جبکہ تنخواہ دار طبقے کے لیے 15 فیصد مقرر کیا جائے۔

صدر ایف پی سی سی آئی عاطف اکرام نے کہا کہ بے روزگاری اور صنعتوں کے مسائل برقرار ہیں، مسابقتی بجلی کی کمی اور ریفنڈز کی بروقت عدم ادائیگی چھوٹی صنعتوں کے لیے مشکلات پیدا کر رہی ہے، اور وزیر اعظم سے اپیل کی کہ جلد از جلد صنعتوں کو بچایا جائے۔