برطانیہ نے یورپی یونین میں دوبارہ شمولیت کا امکان مسترد کر دیا

برطانوی وزیراعظم اینڈی برنہم نے موجودہ پارلیمانی مدت کے دوران برطانیہ کی یورپی یونین (EU) میں دوبارہ شمولیت کے تمام امکانات کو مسترد کرتے ہوئے کہا ہے کہ اگرچہ وہ اپنی ذاتی زندگی میں اس پیش رفت کے خواہاں ہیں، تاہم فی الحال حکومت کے زیر غور ایسا کوئی منصوبہ موجود نہیں۔

عالمی میڈیا کی رپورٹس کے مطابق برطانوی میڈیا کو دیے گئے ایک انٹرویو میں وزیراعظم اینڈی برنہم نے اعتراف کیا کہ برطانیہ اس وقت یورپی یونین میں دوبارہ واپسی کے مرحلے سے بہت دور ہے۔ انہوں نے اس بات کا بھی اظہار کیا کہ بریگزٹ کے بعد گزرنے والی ایک دہائی کے تجربات بالکل بھی توقعات کے مطابق ثابت نہیں ہوئے، اور ان کے بقول یورپی یونین سے علیحدگی نے برطانوی معیشت کو شدید کمزور کیا ہے جبکہ امیگریشن پر مؤثر کنٹرول کے حوالے سے بھی وہ مطلوبہ نتائج حاصل نہیں ہو سکے جن کا دعویٰ کیا گیا تھا۔ اس موقع پر انہوں نے غیر قانونی تارکینِ وطن کی جانب سے چھوٹی کشتیوں کے ذریعے خطرناک سفر کر کے برطانیہ پہنچنے کے جاری بحران کا حوالہ بھی دیا۔

واضح رہے کہ جون 2016 میں ہونے والے تاریخی بریگزٹ ریفرنڈم میں تقریباً 52 فیصد برطانوی ووٹرز نے یورپی یونین سے علیحدگی کے حق میں ووٹ دیا تھا، جس کے بعد برطانیہ نے جنوری 2020 میں باضابطہ طور پر یورپی یونین چھوڑ دی تھی۔ برطانیہ کی لیبر پارٹی نے 2024 کے عام انتخابات میں دارالعوام میں واضح اکثریت حاصل کی تھی، اور آئینی روایات کے مطابق قبل از وقت انتخابات نہ ہونے کی صورت میں موجودہ پارلیمانی مدت پانچ سال تک جاری رہنے کی توقع ہے۔