برطانیہ میں آر اے ایف فیئر فورڈ ایئربیس واقعے میں ملوث 2 افراد پر فرد جرم عائد

برطانیہ میں امریکی فوج کے زیرِ استعمال ‘آر اے ایف فیئر فورڈ’ (RAF Fairford) ایئربیس کے قریب پیش آنے والے مشتبہ سکیورٹی واقعے میں ملوث دو افراد پر باضابطہ طور پر فردِ جرم عائد کر دی گئی ہے۔

برطانوی میڈیا کے مطابق ان میں سے ایک ملزم پر غیر ملکی انٹیلی جنس سروس (ایرانی انٹیلی جنس) کی معاونت کرنے کا سنگین الزام عائد کیا گیا ہے، اور قومی سلامتی سے متعلق ان الزامات کے تحت دونوں برطانوی شہری جلد عدالت میں پیش ہوں گے۔ واضح رہے کہ یہ واقعہ 27 ستمبر کو پیش آیا تھا جب اس اہم امریکی ایئربیس کے قریبی علاقوں میں تین مشتبہ گاڑیاں دیکھی گئی تھیں، جن کی اطلاع ملنے پر برطانوی پولیس نے موقع پر پہنچ کر تلاشی لی اور ایئربیس کے قریب سے پیٹرول برآمد کیا، تاہم خوش قسمتی سے کوئی دھماکا خیز مواد نہیں ملا تھا۔

رپورٹس کے مطابق اس سکیورٹی واقعے کے سلسلے میں اب تک مجموعی طور پر 8 افراد کو حراست میں لیا جا چکا ہے، جن میں سے تفتیش کے بعد 6 افراد کو ضمانت پر رہا کر دیا گیا ہے جبکہ دیگر ملزمان کے خلاف تحقیقات کا دائرہ کار مزید وسیع کر دیا گیا ہے۔