اردن کا چرچ حملے کے بعد جنوبی شام پر فضائی حملہ، متعدد ہلاکتوں کا دعویٰ

اردن کی مسلح افواج کی رائل ایئر فورس نے جنوبی شام میں مبینہ دہشت گرد تنظیموں کے ٹھکانوں کو نشانہ بناتے ہوئے ایک بڑی فضائی کارروائی کا اعلان کیا ہے۔

عالمی میڈیا کی رپورٹس کے مطابق اردنی فوج کا کہنا ہے کہ یہ عسکری کارروائی مملکت کے جنوبی صوبے الکرک میں ایک تاریخی چرچ پر ہونے والے وحشیانہ حملے کے متاثرین کے خون کا بدلہ لینے کے لیے کی گئی ہے، اور اس کارروائی سے قبل شامی دارالحکومت دمشق کو بھی اعتماد میں لیا گیا تھا۔ یاد رہے کہ الکرک کے علاقے ‘حمود’ میں تین مسلح افراد نے ایک مقامی چرچ پر فائرنگ کا حملہ کیا تھا جس کے نتیجے میں 9 افراد جاں بحق اور تقریباً 40 افراد زخمی ہو گئے تھے۔

اردنی فوج کے جاری کردہ بیان کے مطابق ’اردنین ڈیٹرنس، حمود‘ (Jordanian Deterrence, Hamoud) نامی اس خصوصی فضائی آپریشن کا نام اسی گاؤں کے نام پر رکھا گیا ہے جہاں چرچ پر دہشت گردانہ حملہ کیا گیا تھا۔ فوج نے دعویٰ کیا ہے کہ اس حملے میں ملوث عناصر کا تعلق کالعدم دہشت گرد تنظیموں سے تھا۔ بیان میں مزید بتایا گیا ہے کہ اردنی رائل ایئر فورس کے لڑاکا طیاروں نے درست نشانے لگاتے ہوئے دہشت گردوں کے متعدد ٹھکانوں کو مکمل طور پر تباہ کر دیا، جن کے نتیجے میں کئی عسکریت پسند ہلاک یا شدید زخمی ہوئے ہیں جبکہ ان کی متعدد گاڑیاں بھی اس کارروائی میں تباہ ہو گئی ہیں۔