پاکستان نے 54 ارب روپے کی چینی درآمد کرلی، تفصیلات قومی اسمبلی میں پیش

قومی اسمبلی کے اجلاس میں وقفہ سوالات کے دوران وزارتِ تجارت نے چینی کی درآمد سے متعلق تفصیلات پیش کرتے ہوئے بتایا ہے کہ مالی سال 2025-26 میں 31 اگست 2026 تک 54 ارب 15 کروڑ 65 لاکھ روپے کی لاگت سے 3 لاکھ 6 ہزار 373 میٹرک ٹن چینی درآمد کی گئی۔ اس عرصے میں عالمی منڈی میں چینی کی قیمت 575.56 امریکی ڈالر فی میٹرک ٹن رہی جبکہ درآمد پر 20 فیصد کسٹمز ڈیوٹی بھی ختم کی گئی تھی۔ وزارتِ تجارت کے مطابق چینی کی درآمد کا فیصلہ وزارتِ قومی غذائی تحفظ نے کیا تھا جس میں ٹریڈنگ کارپوریشن آف پاکستان (ٹی سی پی) کا کوئی کردار نہیں تھا۔ درآمد شدہ چینی میں سے 1 لاکھ 98 ہزار میٹرک ٹن سے زائد چینی 168 روپے 24 پیسے فی کلو کے حساب سے فروخت کی جا چکی ہے، جبکہ بقایا 1 لاکھ 8 ہزار میٹرک ٹن چینی ٹی سی پی کے گوداموں میں موجود ہے جس کی برآمد کے لیے ابھی تک کوئی ٹینڈر جاری نہیں کیا گیا۔