کراچی اسکواش ٹورنامنٹ: ریفری سے نامناسب رویہ، مصری کھلاڑی مشکل میں

کراچی انٹرنیشنل اسکواش ٹورنامنٹ میں ریفری کے خلاف نامناسب رویہ اختیار کرنے پر مصری کھلاڑی فیرس ڈیسوکی کو جرمانے اور ممکنہ پابندی کا سامنا ہے۔ بدتمیزی اور فیصلے کو تسلیم کرنے سے انکار پر پاکستانی ریفری سجاد خان نے واقعے کی رپورٹ پروفیشنل اسکواش ایسوسی ایشن (PSA) کو ارسال کر دی ہے۔

ڈی ایچ اے کریک کلب میں جاری ٹورنامنٹ کے دوسرے راؤنڈ میں عالمی انڈر 23 چیمپئن اور عالمی نمبر 38 نور زمان کے خلاف میچ کے دوران مصر کے عالمی نمبر 15 فیرس ڈیسوکی نے ریفری کے فیصلے پر شدید اعتراض کیا۔ اس دوران مصری کھلاڑی نے ریفری کی قومیت کے بارے میں بھی سوال کیا، جس سے صورتحال مزید کشیدہ ہو گئی۔

تیسرے گیم میں نور زمان کی 3-7 کی برتری پر فیرس ڈیسوکی نے فیصلے پر سخت غصے کا اظہار کیا۔ بار بار تنبیہ کے باوجود وہ کورٹ سے باہر آ کر بحث کرتے رہے اور شدید چیخ و پکار کی، جس پر ریفری نے قواعد کے مطابق فیصلہ سناتے ہوئے نور زمان کو 0-3 سے فاتح قرار دے دیا۔

میچ کے اختتام پر مصری کھلاڑی نے کورٹ سے نکلتے ہوئے نور زمان سے ہاتھ تو ملا لیا، تاہم ان کے رویے پر ٹورنامنٹ انتظامیہ اور اسکواش حلقوں میں تشویش پائی جا رہی ہے۔

دوسری جانب عالمی انڈر 23 چیمپئن نور زمان نے کہا کہ ریفری سے غلطی ہو سکتی ہے، لیکن کھلاڑی کو ہر صورت اپنا رویہ بہتر رکھنا چاہیے۔ ان کا کہنا تھا کہ میچ کا اس طرح ختم ہونا افسوسناک ہے۔