پاکستان فٹبال کے لیے تاریخی کامیابی، پہلی بار یوئیفا ڈیولپمنٹ ٹورنامنٹ میں شرکت

پاکستان فٹبال کے لیے ایک بڑا بریک تھرو سامنے آ گیا ہے، جہاں پاکستان نے پہلی بار یوئیفا فٹبال ڈیولپمنٹ ٹورنامنٹ میں شرکت کا اعزاز حاصل کر لیا ہے۔

صدر پاکستان فٹبال فیڈریشن محسن گیلانی کے مطابق پاکستان انڈر 16 فٹبال ٹیم اپریل میں یوئیفا ڈیولپمنٹ ٹورنامنٹ میں ایکشن میں نظر آئے گی۔ یہ ٹورنامنٹ 24 سے 30 اپریل تک قازقستان میں منعقد ہوگا۔

محسن گیلانی نے بتایا کہ ٹورنامنٹ میں میزبان قازقستان کے علاوہ روس اور آذربائیجان کی ٹیمیں بھی شریک ہوں گی۔ ان کا کہنا تھا کہ یوئیفا ایونٹ میں شرکت پاکستان فٹبال کی تاریخ کا ایک اہم سنگِ میل ہے۔

صدر پی ایف ایف کے مطابق اس ٹورنامنٹ کے ذریعے نوجوان پاکستانی کھلاڑیوں کو عالمی معیار کی فٹبال سیکھنے اور بین الاقوامی تجربہ حاصل کرنے کا قیمتی موقع ملے گا۔ انہوں نے واضح کیا کہ یوتھ ڈیولپمنٹ پاکستان فٹبال فیڈریشن کی اولین ترجیح ہے۔

محسن گیلانی کا کہنا تھا کہ یوئیفا ڈیولپمنٹ ٹورنامنٹ میں شرکت پاکستان فٹبال کے مستقبل کے لیے نہایت مثبت قدم ہے اور اس سے ملکی فٹبال کو عالمی سطح پر متعارف کرانے میں مدد ملے گی۔