کریٹکل منرلز اینڈ مائنز میں سرمایہ کاری کیلئے مختلف ممالک کو شامل کرنے کا فیصلہ

پاکستان نے اہم معدنیات (کریٹیکل منرلز) اور مائنز کے شعبے میں سرمایہ کاری کے فروغ کے لیے مختلف ممالک کو شامل کرنے کا فیصلہ کر لیا ہے۔ اس سلسلے میں پاکستان امریکا کے ساتھ ساتھ چین، سعودی عرب اور دیگر دوست ممالک کو بھی کریٹیکل منرلز اور مائننگ سیکٹر میں انگیج کرے گا۔

ذرائع کے مطابق اس حوالے سے وفاقی وزیر پٹرولیم نے دنیا بھر میں تعینات پاکستانی سفیروں کے ساتھ ایک آن لائن اجلاس کیا، جس میں معدنی وسائل میں سرمایہ کاری کے مواقع، عالمی شراکت داری اور پاکستان کے ممکنہ کردار پر تفصیلی تبادلہ خیال کیا گیا۔

اجلاس میں بتایا گیا کہ اپریل 2026 میں پاک منرلز انویسٹمنٹ فورم کا انعقاد کیا جائے گا، جس میں دنیا بھر کے بڑے سرمایہ کاروں، معدنیاتی کمپنیوں اور متعلقہ اسٹیک ہولڈرز کو مدعو کیا جائے گا۔ فورم کا مقصد پاکستان کے معدنی وسائل، پالیسی فریم ورک اور سرمایہ کاری کے مواقع کو عالمی سطح پر اجاگر کرنا ہے۔

مزید بتایا گیا کہ رواں ماہ ریاض میں ہونے والے فیوچر منرلز فورم میں بھی پاکستان شرکت کرے گا، جہاں پاکستان کی 13 سرکاری اور نجی منرل کمپنیاں فورم کا حصہ بنیں گی۔ اس فورم کے ذریعے پاکستان عالمی سرمایہ کاروں کے ساتھ روابط مضبوط کرے گا اور معدنی شعبے میں مشترکہ منصوبوں کے امکانات تلاش کیے جائیں گے۔

حکام کا کہنا ہے کہ کریٹیکل منرلز میں سرمایہ کاری نہ صرف ملکی معیشت کے استحکام میں مدد دے گی بلکہ پاکستان کو عالمی سپلائی چین میں ایک اہم کردار ادا کرنے کے قابل بھی بنائے گی۔