2 روز کی تیزی کے بعد سونا سستا، چاندی کی قیمت مستحکم

دو روزہ تیزی کے بعد آج سونے کی قیمت میں کمی دیکھنے میں آئی ہے جبکہ چاندی کی قیمت مستحکم رہی۔ آل صرافہ ایسوسی ایشن کے مطابق مقامی گولڈ مارکیٹ میں 24 قیراط فی تولہ سونا 1200 روپے سستا ہو کر 4 لاکھ 66 ہزار 762 روپے کا ہو گیا۔ اسی طرح دس گرام سونے کی قیمت میں 1028 روپے کمی ہوئی جس کے بعد نئی قیمت 4 لاکھ 173 روپے ہو گئی۔

عالمی مارکیٹ میں بھی سونے کی قیمت میں کمی دیکھی گئی، جہاں فی اونس سونا 12 ڈالر سستا ہو کر 4444 ڈالر پر آ گیا۔ دوسری جانب ملک بھر میں چاندی کی فی تولہ قیمت بغیر کسی تبدیلی کے 8361 روپے کی سطح پر برقرار ہے۔