پاکستان کبڈی کے 4 کھلاڑیوں پر 4 سال کی پابندی عائد

پاکستان کبڈی کے چار کھلاڑیوں پر ڈوپنگ قوانین کی خلاف ورزی کے باعث چار، چار سال کی پابندی عائد کر دی گئی ہے۔ یہ پابندی لاہور میں ہونے والی نیشنل کبڈی چیمپئن شپ کے دوران ڈوپ ٹیسٹ نہ دینے پر لگائی گئی۔

ذرائع کے مطابق نیشنل چیمپئن شپ کے دوران چاروں کھلاڑیوں نے ڈوپ ٹیسٹ دینے سے انکار کیا، جسے قوانین کے تحت مثبت ٹیسٹ تصور کیا جاتا ہے۔ اس پر پاکستان اینٹی ڈوپنگ آرگنائزیشن نے ضابطوں کے مطابق کارروائی کرتے ہوئے چار سالہ پابندی کا نوٹیفکیشن جاری کر دیا۔

پابندی کا سامنا کرنے والے کھلاڑیوں میں عبیداللہ راجپوت، ملک بن یامین، رانا حیدر اور کاشف سندھو شامل ہیں۔

ادھر پاکستان کبڈی فیڈریشن کی ڈسپلنری کمیٹی کا اجلاس 12 جنوری کو لاہور میں طلب کر لیا گیا ہے، جہاں چاروں کھلاڑی کمیٹی کے سامنے پیش ہو کر اپنا مؤقف پیش کریں گے۔ اجلاس میں کھلاڑیوں کے بیانات سننے کے بعد آئندہ لائحہ عمل کا فیصلہ کیا جائے گا۔