عالمی بینک کا سندھ فلڈ منصوبے پر اطمینان سندھ حکومت کی کارکردگی کا ثبوت ہے، شرجیل میمن

سندھ کے سینئر وزیر شرجیل انعام میمن نے کہا ہے کہ عالمی بینک کی جانب سے سندھ فلڈ ایمرجنسی ریہیبلیٹیشن منصوبے کی کارکردگی کو تسلی بخش قرار دینا سندھ حکومت کی مؤثر منصوبہ بندی اور کامیاب عملدرآمد کا ثبوت ہے۔

اپنے بیان میں شرجیل میمن نے بتایا کہ اس منصوبے کے تحت صوبے بھر میں اہم انفراسٹرکچر کی بحالی کے ذریعے 72 لاکھ سے زائد افراد مستفید ہوئے، جن میں 34 لاکھ خواتین شامل ہیں۔ انہوں نے کہا کہ سندھ حکومت نے سیلاب متاثرین کی بحالی کو اولین ترجیح دی اور محدود وسائل کے باوجود شفافیت، تیز رفتاری اور مؤثر عملدرآمد کو یقینی بنایا۔

سینئر وزیر کا کہنا تھا کہ عالمی بینک کی جانب سے منصوبے کی پیش رفت کو تسلی بخش قرار دینا اس بات کی تصدیق ہے کہ حکومت سندھ درست سمت میں آگے بڑھ رہی ہے۔ ان کے مطابق یہ منصوبہ متاثرہ علاقوں میں بنیادی سہولیات کی بحالی کے ساتھ ساتھ معاشی اور سماجی استحکام میں بھی اہم کردار ادا کر رہا ہے۔