یوزر نیم فیچر پر بھارتی خدشات مسترد، واٹس ایپ نے واضح موقف بیان کردیا

میٹا کی ملکیت والی مقبول میسجنگ ایپ واٹس ایپ نے اپنے متوقع ‘یوزر نیم فیچر’ سے متعلق بھارتی حکومت کے تحفظات کو مسترد کرتے ہوئے واضح کیا ہے کہ اس سہولت کو متعارف کرانے سے پہلے تمام ممکنہ خطرات کا جائزہ لے کر ضروری حفاظتی اقدامات پہلے ہی شامل کر لیے گئے ہیں۔ بھارتی حکومت نے دھوکا دہی، جعل سازی اور معروف شخصیات کی شناخت چوری ہونے کے خدشات کے پیش نظر واٹس ایپ سے یہ فیچر روکنے کا مطالبہ کیا تھا، کیونکہ اس کے تحت صارفین فون نمبر ظاہر کیے بغیر بھی رابطہ کر سکیں گے۔ واٹس ایپ ترجمان کے مطابق، فی الحال صارفین کو صرف نام محفوظ کرنے کی سہولت دی گئی ہے اور یہ فیچر رواں سال مرحلہ وار متعارف کرایا جائے گا۔ کمپنی نے یقین دہانی کرائی ہے کہ عوامی شخصیات، تصدیق شدہ میٹا اکاؤنٹس اور سرکاری اداروں کے مخصوص پروفائل نام عام صارفین کے لیے دستیاب نہیں ہوں گے تاکہ جعل سازی کا کوئی امکان نہ رہے، اور اس کا بنیادی مقصد صارفین کی رازداری (پرائیویسی) کو مزید بہتر بنانا ہے۔