سابق وزیراعظم آزاد کشمیر پی پی پی سے علیحدگی کے بعد استحکام پاکستان پارٹی میں شامل

آزاد جموں و کشمیر کی سیاست میں ایک بڑی پیش رفت سامنے آئی ہے جہاں سابق وزیراعظم سردار تنویر الیاس نے پاکستان پیپلز پارٹی (پی پی پی) سے راہیں جدا کر کے اپنے ساتھیوں سمیت استحکام پاکستان پارٹی (آئی پی پی) میں شمولیت کا اعلان کر دیا ہے۔ سردار تنویر الیاس نے وفاقی وزیر اور استحکام پاکستان پارٹی کے سربراہ عبدالعلیم خان سے ایک اہم ملاقات کی، جس کے بعد انہوں نے یہ سیاسی فیصلہ کیا۔ ان کے ہمراہ آزاد کشمیر کے وزیر زراعت چوہدری علی شان سونی، سابق وزیر صحت انصار ابدالی اور سابق مشیر وزیراعظم سردار افتخار رشید نے بھی آئی پی پی میں شمولیت اختیار کر لی ہے۔ آئی پی پی کے صدر عبدالعلیم خان نے تمام رہنماؤں کا خیرمقدم کرتے ہوئے ان کے لیے نیک خواہشات کا اظہار کیا، جبکہ نو شامل ہونے والے سیاست دانوں نے علیم خان کی قیادت پر بھرپور اعتماد کا اظہار کرتے ہوئے آزاد کشمیر میں سیاسی سرگرمیاں تیز کرنے کا عزم ظاہر کیا۔