امریکا اور 12 ممالک کا آبنائے ہرمز میں بلا رکاوٹ تجارت برقرار رکھنے پر اتفاق

امریکا اور مشرقِ وسطیٰ کے 12 ممالک نے عالمی تجارت کے اہم ترین بحری راستے ‘آبنائے ہرمز’ میں بلا رکاوٹ تجارتی سرگرمیاں جاری رکھنے کے لیے مشترکہ کوششیں تیز کرنے پر اتفاق کیا ہے۔

امریکی سینٹرل کمانڈ (سینٹکام) کی قیادت میں بحرین میں خطے کے اعلیٰ فوجی حکام کا ایک اہم سکیورٹی اجلاس منعقد ہوا، جس میں مشرقِ وسطیٰ کی موجودہ سکیورٹی صورتحال، علاقائی استحکام اور دفاعی تعاون کے فروغ پر تفصیلی تبادلہ خیال کیا گیا۔ اس اہم بیٹھک میں امریکا سمیت سعودی عرب، قطر، عمان، بحرین، مصر، اردن، کویت، لبنان، شام، متحدہ عرب امارات اور یمن کے اعلیٰ فوجی حکام نے شرکت کی۔ شرکا نے اس عزم کا اظہار کیا کہ خطے میں دفاعی تعاون کو مزید مضبوط بنا کر آبنائے ہرمز میں بحری تجارت کے تسلسل کو ہر صورت یقینی بنایا جائے گا۔

اجلاس کے موقع پر سینٹکام کے سربراہ ایڈمرل بریڈ کوپر نے اتحادیوں کو یقین دہانی کرواتے ہوئے کہا کہ امریکا علاقائی سلامتی اور استحکام کے لیے اپنے شراکت داروں کے ساتھ شانہ بشانہ کھڑا ہے۔ ان کا مزید کہنا تھا کہ امریکا اپنے علاقائی اتحادیوں کے تعاون سے مشرقِ وسطیٰ میں دنیا کا جدید ترین اور مؤثر ترین فضائی و میزائل دفاعی نظام چلا رہا ہے۔

دوسری جانب، اس اجلاس پر تہران کی طرف سے شدید ردعمل دیکھنے میں آیا ہے۔ ایرانی نائب وزیر خارجہ نے واضح مؤقف اختیار کرتے ہوئے کہا کہ آبنائے ہرمز کا مکمل انتظام اور سکیورٹی صرف ایران کے اختیار میں ہے، سینٹکام یا کسی بیرونی طاقت کے پاس نہیں۔