اسحاق ڈار اور سعودی وزیر خارجہ کا رابطہ، ایران امریکا مذاکرات میں پیش رفت پر اطمینان

نائب وزیراعظم اور وزیر خارجہ محمد اسحاق ڈار اور سعودی وزیر خارجہ شہزادہ فیصل بن فرحان کے درمیان ایک اہم ٹیلیفونک رابطہ ہوا ہے، جس میں دوحہ میں ہونے والے حالیہ ثالثی مذاکرات اور خطے کی مجموعی صورتحال پر تفصیلی تبادلۂ خیال کیا گیا۔

ترجمان کے مطابق دونوں وزرائے خارجہ نے دوحہ مذاکرات میں ہونے والی مثبت پیش رفت پر گہرے اطمینان کا اظہار کیا اور اس امید کو ظاہر کیا کہ ایران اور امریکہ کے درمیان بات چیت کا یہ سلسلہ مستقبل قریب میں بھی جاری رہے گا۔

ترجمان کا مزید کہنا ہے کہ گفتگو کے دوران سعودی وزیر خارجہ نے اسلام آباد مفاہمتی یادداشت (ایم او یو) پر عملدرآمد کے لیے پاکستان کی مخلصانہ کوششوں کو خصوصی طور پر سراہا۔ دونوں رہنماؤں نے خطے میں پائیدار امن و استحکام کے فروغ کے لیے آپسی رابطے اور تعاون کو مسلسل جاری رکھنے پر بھی مکمل اتفاق کیا۔