پی ٹی آئی کی اسیر قیادت کا جیل سے چیئرمین اور سیکرٹری جنرل کو خط؛ آزاد کشمیر انتخابات میں حصہ لینے کا فیصلہ

پاکستان تحریک انصاف (پی ٹی آئی) کی جیل میں قید قیادت نے پارٹی چیئرمین اور سیکرٹری جنرل کو ایک اہم خط ارسال کیا ہے، جس میں آزاد کشمیر کے آئندہ انتخابات میں بھرپور حصہ لینے کی درخواست کی گئی ہے۔ ذرائع کے مطابق، ڈاکٹر یاسمین راشد، شاہ محمود قریشی اور جیل میں اسیر دیگر رہنماؤں نے اپنے وکیل کے ذریعے بھجوائے گئے اس مشترکہ خط میں مؤقف اختیار کیا ہے کہ آزاد کشمیر سپریم کورٹ کے فیصلے کے باوجود پی ٹی آئی کو بطور جماعت انتخابی عمل سے باہر نہیں رہنا چاہیے۔ خط کے متن میں کہا گیا ہے کہ اسیر قیادت نے اس معاملے پر تفصیلی مشاورت کے بعد یہ فیصلہ کیا ہے کہ پی ٹی آئی کے حمایت یافتہ امیدواروں کو لازمی طور پر انتخابات میں حصہ لینا چاہیے، اور پارٹی کو فوری طور پر ان تمام امیدواروں کے ناموں کی فہرست شائع کرنی چاہیے جنہیں تحریک انصاف کی باقاعدہ حمایت حاصل ہوگی۔