دنیا کے طاقتور ترین پاسپورٹس ، سنگاپور پہلے ، یو اے ای، جاپان اور جنوبی کوریا دوسرے نمبر پر

سال 2026 کی دوسری ششماہی کے لیے دنیا بھر کے طاقتور ترین پاسپورٹس کی نئی عالمی درجہ بندی جاری کر دی گئی ہے۔ “ہینلے اینڈ پارٹنرز” کی جانب سے جولائی سے دسمبر 2026 کے لیے جاری کردہ اس فہرست میں ایشیائی ملک سنگاپور کے پاسپورٹ کو ایک بار پھر دنیا کا طاقتور ترین پاسپورٹ قرار دیا گیا ہے، جبکہ پاکستانی پاسپورٹ ایک بار پھر دنیا کے نچلے ترین نمبروں پر موجود ہے۔

انڈیکس کے مطابق، سنگاپور کا پاسپورٹ رکھنے والے شہری دنیا کے 192 ممالک میں بغیر ویزا (ویزا فری) سفر کر سکتے ہیں۔ فہرست میں دوسرے نمبر پر بھی 3 ایشیائی ممالک موجود ہیں، جن میں متحدہ عرب امارات (یو اے ای)، جاپان اور جنوبی کوریا مشترکہ طور پر شامل ہیں۔ ان تینوں ممالک کے پاسپورٹ ہولڈرز کو 188 ممالک میں ویزا فری رسائی حاصل ہے۔ رپورٹ کے مطابق، متحدہ عرب امارات کا پاسپورٹ گزشتہ ایک دہائی میں سب سے تیزی سے ترقی کرنے والا پاسپورٹ رہا ہے، جس کی رینکنگ میں 40 درجے بہتری آئی اور وہ اب دوسرے نمبر پر آ گیا ہے۔

فہرست میں تیسرے نمبر پر یورپی ملک سوئیڈن ہے جس کے پاسپورٹ پر 187 ممالک میں ویزا فری سہولت موجود ہے۔ چوتھے نمبر پر مشترکہ طور پر بیلجیئم، ڈنمارک، فن لینڈ، فرانس، جرمنی، آئرلینڈ، اٹلی، لگسمبرگ، نیدرلینڈز، ناروے اور اسپین موجود ہیں، جن کے شہریوں کو 186 ممالک میں ویزا فری داخلہ مل سکتا ہے۔ پانچویں نمبر پر یونان، آسٹریا، مالٹا، پرتگال اور سوئٹزر لینڈ براجمان ہیں جن کے پاسپورٹ پر 185 ممالک کا سفر ویزا کے بغیر ممکن ہے۔ دوسری جانب، امریکی پاسپورٹ، جو کسی زمانے میں دنیا کا طاقتور ترین پاسپورٹ سمجھا جاتا تھا، اب دسویں نمبر پر پہنچ گیا ہے۔

پاسپورٹ انڈیکس میں سفری آسانی کو مدنظر رکھتے ہوئے پاکستان کو دنیا کا چوتھا کمزور ترین پاسپورٹ رکھنے والا ملک قرار دیا گیا ہے۔ عالمی درجہ بندی میں پاکستانی پاسپورٹ 100 ویں نمبر پر ہے، جس پر دنیا کے صرف 30 ممالک میں ویزا فری داخلہ ممکن ہے۔

رپورٹ کے مطابق دنیا کے کمزور ترین پاسپورٹس کی فہرست میں پاکستان سے نیچے محض تین ممالک عراق (101)، شام (102) اور افغانستان (103) موجود ہیں۔ دیگر پڑوسی اور علاقائی ممالک میں یمن 99 ویں، صومالیہ 98 ویں، نیپال 97 ویں، شمالی کوریا اور بنگلا دیش 96 ویں، فلسطین اور ایران 95 ویں، اریٹیریا 94 ویں، جبکہ سری لنکا اور لیبیا 93 ویں نمبر پر موجود ہیں۔