اپنی سرزمین کا ایک انچ بھی اسرائیل کے حوالے نہیں کریں گے؛ لبنانی صدر

لبنانی صدر جوزف عون نے اسرائیل کے ساتھ جاری مذاکرات کا بھرپور دفاع کرتے ہوئے واضح کیا ہے کہ ان کی حکومت ملک کی خودمختاری پر کوئی سمجھوتہ نہیں کرے گی اور لبنان اپنی سرزمین کا ایک انچ بھی اسرائیل کے حوالے نہیں کرے گا۔

عالمی خبر رساں ادارے کے مطابق لبنانی ایوانِ صدر کی جانب سے جاری ایک اہم بیان میں صدر عون نے کہا کہ اسرائیل کے ساتھ جاری مذاکرات کو “غداری” قرار دینا بالکل غلط اور ناانصافی ہے۔ ان کا مقصد لبنان کے قومی مفادات، خودمختاری اور سرحدی حقوق کا مکمل اور فول پروف تحفظ یقینی بنانا ہے۔ صدر عون کے بقول، اب وقت آ گیا ہے کہ لبنان طویل جنگوں اور بیرونی سرپرستی کے دور سے باہر نکلے۔ ملک کے عوام، خصوصاً جنوبی لبنان کے رہائشی، اب عزت، امن اور سلامتی کے ساتھ زندگی گزارنے کے حق دار ہیں۔

انہوں نے مزید کہا کہ اسرائیل کے ساتھ طے پانے والے فریم ورک معاہدے کی شقیں لبنان کے آئینی اصولوں یا قومی حقوق سے قطعاً متصادم نہیں ہیں بلکہ ان کے تحفظ کو یقینی بنانے کے لیے ہی مرتب کی گئی ہیں۔ صدر جوزف عون نے اپوزیشن کا نام لیے بغیر کہا کہ جو بھی خودمختاری کے اصول کا احترام کرتا ہے، اسے اس نازک معاملے میں ریاست کے فیصلے کا بھی احترام کرنا چاہیے۔

واضح رہے کہ امریکہ کی ثالثی میں لبنانی حکومت اور اسرائیل کے درمیان طے پانے والے جنگ بندی معاہدے پر صدر جوزف عون کو اپوزیشن کی جانب سے شدید سیاسی تنقید کا سامنا ہے۔ اپوزیشن جماعتوں کا مؤقف ہے کہ اس معاہدے سے لبنان کی خودمختاری اور علاقائی سالمیت متاثر ہو سکتی ہے اور اسرائیل کو متنازع سرحدی علاقوں میں فائدہ پہنچنے کا خدشہ ہے۔ گزشتہ برس دونوں ممالک کے درمیان سرحدی جھڑپوں میں شدت آنے کے بعد بین الاقوامی ثالثی کی کوششوں سے جنگ بندی ہوئی تھی، تاہم سرحدی امور پر مذاکرات کے باوجود کئی اہم معاملات اب بھی حل طلب ہیں۔