وینزویلا میں تباہ کن زلزلے کے بعد آسمان سرخ ہوگیا

وینزویلا میں ایک تباہ کن زلزلے کے بعد آسمان کا رنگ اچانک گہرا سُرخ ہو گیا، جس کی ویڈیوز اور تصاویر سوشل میڈیا پر تیزی سے وائرل ہو رہی ہیں۔

رپورٹ کے مطابق، یہ حیرت انگیز واقعہ ایک ایسے نازک وقت پر سامنے آیا ہے جب وینزویلا میں حالیہ تباہ کن زلزلوں کے بعد بڑے پیمانے پر امدادی کارروائیاں جاری ہیں اور ملبے تلے دبے ہزاروں افراد اب بھی لاپتا ہیں۔ ہولناک زلزلے کے فوراً بعد اچانک آسمان کے سرخ رنگ کو دیکھ کر جہاں مقامی آبادی میں خوف و ہراس پھیل گیا اور بعض افراد نے اسے کسی نئی الٰہی آفت کا پیش خیمہ قرار دیا، متعدد سوشل میڈیا صارفین نے اس غیر معمولی اور سحر انگیز منظر پر شدید حیرت کا اظہار کیا۔

تاہم، سائنسی ماہرین نے عوام کے ان تمام خدشات کو مسترد کرتے ہوئے واضح کیا ہے کہ یہ محض ایک قدرتی فضائی مظہر ہے جسے مقامی زبان میں “کاندیلازو” کہا جاتا ہے۔ ماہرین کا کہنا ہے کہ غروبِ آفتاب کے وقت جب سورج کی روشنی فضا میں موجود گرد، باریک ذرات اور صحارا کی طرف سے آنے والے صحرائی غبار سے گزرتی ہے، تو سرخ اور نارنجی شعاعیں فضا میں زیادہ نمایاں ہو جاتی ہیں۔ اس پورے عمل کو سائنسی زبان میں ‘رے لی اسکیٹرنگ’ (Rayleigh Scattering) کہا جاتا ہے۔

ماہرین نے شہریوں کو مطمئن کرتے ہوئے مزید کہا کہ اس سرخ آسمان کا حالیہ زلزلوں سے براہِ راست کوئی سائنسی تعلق ثابت نہیں ہوا۔ البتہ زلزلوں کے بعد عمارتیں گرنے سے فضا میں گرد و غبار کی مقدار بڑھنے کی وجہ سے یہ رنگ زیادہ گہرا اور نمایاں دکھائی دے سکتا ہے، لیکن اسے کسی بھی نئی قدرتی آفت کی علامت سمجھنا بالکل درست نہیں ہے۔