خاتون کاروباری شخصیت کا ملازماؤں کو مہنگے فولڈ ایبل آئی فونز کا تحفہ

متحدہ عرب امارات میں ایک خاتون کاروباری شخصیت نے اپنی کمپنی میں کام کرنے والی تمام خواتین کو سرپرائز دیتے ہوئے مہنگے ترین فولڈ ایبل آئی فونز (iPhone Duo) تحفے میں دے کر خوشگوار حیرت میں مبتلا کر دیا ہے۔

کمپنی کی منیجنگ ڈائریکٹر (MD) حسینہ نشاد نے یہ بیش قیمت تحائف اچانک اپنی ملازماؤں کی ورک ڈیسک پر رکھے، جن کی پیکنگ کھولنے پر خواتین کو تقریباً 2 ہزار امریکی ڈالر (پاکستانی ساڑھے 5 لاکھ روپے سے زائد) مالیت کے ‘آئی فون ڈو’ ملے۔ حیران کن اور غیر متوقع تحفہ ملنے پر خواتین انتہائی جذباتی ہو گئیں۔ حسینہ نشاد نے نہ صرف دفتری عملے بلکہ اپنے گھر میں صفائی ستھرائی کا کام کرنے والی خاتون کو بھی یہی مہنگا فون تحفے میں دیا، جس پر وہ جذباتی ہو کر حسینہ نشاد کو گلے لگا کر رو پڑیں۔

حسینہ نشاد نے اپنے سوشل میڈیا پلیٹ فارم انسٹاگرام پر ان تحائف کی ویڈیو شیئر کرتے ہوئے وجہ بیان کی کہ وہ جانتی ہیں کہ ہر عورت کے اپنے خواب، ذمہ داریاں اور مشکلات ہوتی ہیں۔ ان کی خواہش ہے کہ تمام خواتین مضبوط اور پراعتماد بن کر اپنے خواب پورے کریں۔ ان کا مزید کہنا تھا کہ کسی خاتون کی کامیابی انہیں سب سے زیادہ فخر محسوس کراتی ہے، کیونکہ جب ایک عورت ترقی کرتی ہے تو وہ دوسری خواتین کے لیے بھی حوصلے اور ترقی کا باعث بنتی ہے۔