بھارت: 50 سالہ شخص دانت صاف کرتے ہوئے برش ہی نگل گیا

بھارتی ریاست مہاراشٹرا کے رہائشی 50 سالہ رکشہ ڈرائیور راجندر مالوسرے دانت صاف کرتے ہوئے غلطی سے 19 سینٹی میٹر لمبا پورا ٹوتھ برش نگل گئے، جسے ڈاکٹروں نے بغیر کسی پیچیدہ سرجری کے کامیابی سے باہر نکال لیا۔ ابتدائی ایکسرے میں برش ظاہر نہ ہونے پر اینڈوسکوپی کی گئی جس سے اس کی معدے میں موجودگی کا انکشاف ہوا۔ اگرچہ آپریشن کے دوران برش کی لمبائی اور سخت ساخت کی وجہ سے وہ خوراک کی نالی میں دو مقامات پر پھنس گیا، تاہم ڈاکٹروں نے تقریباً 30 منٹ کی محنت کے بعد اسے منہ کے راستے باحفاظت نکال لیا۔ معائنے میں خوراک کی نالی کو کسی قسم کا نقصان نہ پہنچنے کی تصدیق کے بعد مریض کو چند گھنٹوں میں اسپتال سے فارغ کر دیا گیا۔ ماہرین نے خبردار کیا ہے کہ ایسی صورتحال میں قے کروانے یا کھانے پینے کے ذریعے چیز کو نیچے دھکیلنے کی کوشش کرنے کے بجائے فوری طور پر طبی امداد حاصل کرنی چاہیے۔