10 سال سے زائد کی محنت، امریکی شہری نے دنیا کی سب سے بڑی ربڑ بینڈ بال بنا ڈالی

امریکی شہری نے 10 سال سے زائد عرصے کی مسلسل محنت اور لگن کے بعد ربڑ بینڈز (Rubber Bands) سے دنیا کی سب سے بڑی دیوہیکل گیند تیار کر کے گنیز ورلڈ ریکارڈز میں اپنا نام درج کروا لیا ہے۔

گنیز ورلڈ ریکارڈز کے مطابق، کلاڈ پی مور نامی شخص کی تیار کردہ اس غیر معمولی گیند کا کل وزن 11 ہزار 578 پاؤنڈ (تقریباً 5 ہزار 251 کلوگرام) ریکارڈ کیا گیا ہے۔ کلاڈ نے بتایا کہ انہوں نے ہیموفیلیا کی بیماری کے علاج کے دوران ڈاکٹروں کے پاس بار بار جانے کی معطلی میں دل بہلانے کے لیے ربڑ بینڈز کی چھوٹی گیندیں بنانا شروع کی تھیں۔ بعد ازاں 2015ء میں ان کے دوستانہ حلقے نے ایک دیوہیکل گیند بنانے کا چیلنج دیا، جسے انہوں نے سنجیدگی سے قبول کیا۔

وقت گزرنے کے ساتھ ربڑ بینڈز کا حجم اتنا بڑھ گیا کہ اسے گیراج سے منتقل کر کے ایک خصوصی اسٹوریج یونٹ میں رکھنا پڑا۔ رواں سال اگست میں درجنوں افراد کی مدد اور کرین کے ذریعے اسے مشی گن کے شہر ڈیٹرائٹ کے جزیرے ‘بیلے آئل’ منتقل کیا گیا، جہاں گنیز ورلڈ ریکارڈز کے نمائندے کی موجودگی میں اس کا باقاعدہ وزن کر کے سب سے بڑی ربڑ بینڈ بال کا عالمی ریکارڈ جاری کیا گیا۔