دو ہفتوں میں یو اے ای پر 1797 حملے، 1514 ڈرون اور 268 میزائل تباہ

متحدہ عرب امارات کی وزارتِ دفاع نے 28 فروری سے 11 مارچ 2026 تک ملک پر ہونے والے میزائل اور ڈرون حملوں کی تفصیلات جاری کی ہیں، جن کے مطابق اس عرصے میں مجموعی طور پر 1797 حملے کیے گئے، جنہیں فضائی دفاعی نظام نے بڑی حد تک ناکام بنایا۔

وزارتِ دفاع کے بیان کے مطابق اس دوران 268 بیلسٹک میزائل، 15 کروز میزائل اور 1514 ڈرونز فضا میں ہی تباہ کر دیے گئے، جس سے اہم تنصیبات کو بڑے نقصان سے بچایا گیا۔ ابتدائی مرحلے میں دفاعی نظام نے زیادہ تر خطرات ناکام بنائے، تاہم کچھ علاقوں میں گرنے والے ملبے سے محدود مادی نقصان ہوا۔

سرکاری معلومات کے مطابق مارچ کے پہلے ہفتے میں بھی وقفے وقفے سے حملے جاری رہے، جنہیں دفاعی نظام نے فضا میں ہی تباہ کیا۔ ان واقعات میں دو پاکستانیوں سمیت 6 افراد جاں بحق اور 131 زخمی ہوئے۔

وزارتِ دفاع کے تازہ ترین بیان میں بتایا گیا کہ 11 مارچ کو بھی بیلسٹک، کروز میزائل اور ڈرون حملے ناکام بنائے گئے، جس کے بعد مجموعی حملوں کی تعداد 1797 تک پہنچ گئی۔

حکام نے کہا کہ سکیورٹی صورتحال کی مسلسل نگرانی جاری ہے اور دفاعی تیاریوں کو مزید مضبوط بنایا جا رہا ہے تاکہ شہریوں اور رہائشیوں کے تحفظ کو یقینی بنایا جا سکے۔

دوسری جانب، یو اے ای کی قیادت نے اتنی بڑی تعداد میں حملوں کے باوجود امن اور سفارتی کوششوں کو جاری رکھا اور خطے میں کشیدگی بڑھانے کے بجائے صورتحال کو قابو میں رکھنے کی پالیسی اپنائی۔