ایران اور عمان میں آبنائے ہرمز معاہدے پر عملدرآمد انتہائی مشکل ہے: عالمی شپنگ انڈسٹریز

شپنگ انڈسٹریز کے ذرائع نے انکشاف کیا ہے کہ ایران اور عمان کے درمیان زیرِ غور ‘آبنائے ہرمز معاہدے’ پر عملدرآمد امریکی پابندیوں، مالیاتی رکاوٹوں اور انشورنس سے متعلق سخت شرائط کے باعث انتہائی دشوار ثابت ہوگا۔

عالمی شپنگ تنظیموں نے اس مجوزہ معاہدے پر شدید تشویش کا اظہار کرتے ہوئے خبردار کیا ہے کہ آبنائے ہرمز جیسے بین الاقوامی بحری راستے سے گزرنے والے جہازوں پر لازمی فیس یا ٹول (Toll) عائد کرنا بین الاقوامی بحری قوانین کی خلاف ورزی اور ایک خطرناک نظیر قائم کرے گا۔

ذرائع کے مطابق، ایران اس راستے سے گزرنے والے جہازوں کے کارگو کی کل مالیت کا 5 سے 7 فیصد فیس کے طور پر وصول کرنا چاہتا ہے، جبکہ عمان نے 3 فیصد فیس کی تجویز دی ہے۔ دوسری جانب، امریکہ کسی بھی قسم کی بحری فیس یا ٹول عائد کرنے کی سخت مخالفت کر رہا ہے۔

شپنگ کمپنیوں اور تیل کے عالمی تاجروں کا کہنا ہے کہ ایران کو براہِ راست یا بالواسطہ کسی بھی نوعیت کی ادائیگی امریکی پابندیوں کی براہِ راست خلاف ورزی تصور کی جائے گی، جس کے نتیجے میں متعلقہ کمپنیوں کے اثاثے منجمد ہونے کے ساتھ ساتھ شدید قانونی اور مالی مشکلات پیدا ہونے کا خدشہ ہے۔ صنعت کے ماہرین کا ماننا ہے کہ ان پیچیدہ حالات میں فی الوقت اس معاہدے کی عملی تعبیر ممکن دکھائی نہیں دیتی۔