آزاد کشمیر میں بدترین دھاندلی زدہ الیکشن کرایا گیا: نیئر بخاری

پاکستان پیپلز پارٹی کے مرکزی اور آزاد کشمیر کے رہنماؤں نے آزاد کشمیر کے حالیہ انتخابات کو بدترین دھاندلی زدہ قرار دیتے ہوئے نتائج اور انتخاب کے عمل کو سخت تنقید کا نشانہ بنایا ہے۔

اسلام آباد میں پریس کانفرنس کرتے ہوئے پیپلز پارٹی کے سینئر رہنما نیئر بخاری نے کہا کہ آزاد کشمیر میں انتخابات کو تین مختلف مرحلوں میں تقسیم کر کے ہی دھاندلی کی بنیاد رکھ دی گئی تھی۔ انہوں نے سوال اٹھایا کہ کچھ پولنگ اسٹیشنز پر ووٹر ٹرن آؤٹ 90 فیصد سے بھی زیادہ دکھایا گیا ہے، کیا واقعی یہ ممکن ہے؟ نیئر بخاری نے کہا کہ الیکشن کمیشن کو ان تمام بے ضابطگیوں اور دھاندلی سے بروقت آگاہ کیا گیا مگر کوئی اقدام نہیں اٹھایا گیا۔ انہوں نے واضح کیا کہ ہم ن لیگ کا سیاسی میدان میں بھرپور مقابلہ کریں گے۔

پریس کانفرنس کے دوران آزاد کشمیر کے رہنما چودھری لطیف اکبر نے الزام عائد کیا کہ الیکشن کے دوران ان پر حملہ کیا گیا اور پیپلز پارٹی کے ووٹرز اور جیالوں کو پولنگ اسٹیشنز جانے سے روکا گیا۔ اس موقع پر چودھری یاسین نے کہا کہ ن لیگ کے رہنما رانا ثنا اللہ نے ایک سال قبل ہی دعویٰ کر دیا تھا کہ وہ آزاد کشمیر میں حکومت بنائیں گے، جس سے یہ واضح ہوتا ہے کہ سب کچھ پہلے سے طے شدہ منصوبے کے تحت کیا گیا۔